ตํ กุมารกมาทาย, กสฺสปํ รฏฺฐวาสิโน;

วฑฺเฒนฺติ โจฬภยโต, โคปยนฺตา สุสาทราฯ

[24]

โจฬราชา กุมารํ ตํ, สุตฺวา ทฺวาทสวสฺสิกํ;

คหณตฺถาย เปเสสิ, มหามจฺเจ มหาพเลฯ

[25]

อูนํ ปญฺจสหสฺเสน, โยธลกฺขํ สมาทิย;

สพฺพํ เต โรหณํ เทสํ, สงฺโขเภสุ มิโต ตโตฯ

[26]

กิตฺตินาโม’ถ สจิโว, มกฺขกุทฺรูสวาสิโก;

มุทฺธนาโม ตถามจฺโจ, มารคลฺลกวาสิโกฯ

[27]

อุโภปิ เต มหาวีรา, ยุทฺโธปายวิจกฺขณา;

โจฬเสนํ วินาเสตุ-มจฺจนฺตกตนิจฺฉยาฯ

[28]

ปลุฏฺฐคิรินามมฺหิ, ฐาเน ทุคฺเค นิเวสิย;

กตฺวา ฉมาสํ สงฺคามํ, หนิํสุ ทมิเฬ พหูํฯ

[29]

หตาวสิฏฺฐา โจฬาตา, รเณ ตสฺมิํ ภยทฺทิตา;

ปลายิตฺวา ยถาปุพฺพํ, ปุลตฺติปุรมาวสุํฯ

[30]

กุมาโร ชยิโต ทิสฺวา, อุโภ เต สจิเว ตทา;

หฏฺฐตุฏฺโฐ ‘‘วรํ ตาตา, คณฺหถา’’ติ ส จพฺรวีฯ

[31]

พุทฺโธ ปเวณิคามํ โส, วรํ ยาจิตฺถ กิตฺติโก;

สงฺฆิกํ คหิตํ ภาคํ, วิสฺสชฺเชตุํ วรํ วริฯ

[32]

ราชปุตฺตวราลทฺธ-วรา’มจฺจวรา ตทา;

นิทฺทรา สาทรา วีรา, ปาเท วนฺทิํสุ ตสฺส เตฯ

[33]

ราชา ทฺวาทสวสฺสานิ, วสิตฺวา โจฬมณฺฑเล;

อฏฺฐตาลีสวสฺสมฺหิ, มหินฺโท โส ทิวํคโตฯ

[34]

ปมาท โทสานคเตน เอวํ,

ลทฺธา’ปิ โภคานนถิรา ภวนฺติ;

อิจฺจปฺปมํทํ หิตมาสสาโน,

นิจฺจํ สุวิญฺญูสุสมา จเรยฺยฯ

สุชนปฺปสาทสํเวคตฺถาย กเต มหาวํเส

ลํกาวิโลโป นาม

ติปญฺญาสติโม ปริจฺเฉโทฯ

จตุปญฺญาสติม ปริจฺเฉท

ฉ ราชโกนาม

[1]

กตฺวา วิกฺกมฺม พาหู’ติ, นาม ภูปาลสูนุโต;

ตสฺสาณาย ปวตฺติํสุ, สาทรํ สีหฬา ขิลาฯ

[2]

โส ราชา ทมิเฬ หนฺตุํ, ธนํ สญฺจิย’เนกาธา;

สงฺคหํ เสวกานญฺจ, กุรุมาโน ยโถจิตํฯ

[3]

อลงฺการกิรีฏานิ, ฉตฺตสีหาสนานิ จ;

การยิตฺวา’ภิเสกตฺถํ, สจิเวหา’ภิยาจิโตฯ

[4]

น ยาว ราชรฏฺฐสฺส, คหณํ โหติ ตาว เม;

ฉตฺตุสฺสาปนกมฺเมน, กิํ เตนา’ติ วิวาริยฯ

[5]

สตํ นรสหสฺสานํ, สงฺกเลตฺวา มหพฺพโล;

สงฺคามารพฺภ กาลมฺหิ, วาตโรคาภิปีฬิโตฯ

[6]

ยุชฺฌิตุํ สมโย เนติ, ทฺวาทเส วจฺฉเร ลหุํ;

อุเปจฺจ เทวนครํ, คญฺฉิเทวสหพฺยตํฯ

[7]

กิตฺตินาโม จ สจิโว, เสนาปจฺจมธิฏฺฐิโต;

รชฺชตฺถิโก ทินานฏฺฐ, นิชาณํ สมฺปวตฺตยิฯ

[8]

ฆาเตตฺวา ตํ มหาลาน-กิตฺตินาโม มหพฺพโล;

ปตฺวา’ภิเสกํ ภุญฺชนฺโต, เทสํ ตํ โรหณวฺหยํฯ

[9]

สํวจฺฉรมฺหิ ตติเย, โจฬยุทฺเธ ปราชิโต;

สหตฺเถน สกํ สีสํ, ฉินฺทิตฺวา สหสา มริฯ

[10]

ตทาปิเต กิรีฏาทิ-ธนสารํ สมาทิย;

เปเสสุํ ทมิฬา โจฬ-มหีปาลสฺส สนฺติกํฯ

[11]

ภยา สรฏฺฐํ หิตฺวา’ถ, ทุฏฺฐเทเส วสํ ตทา;

เอโก วิกฺกมปณฺฑูติ, วิสฺสุโต ปตฺถิวตฺตโชฯ

[12]

วิญฺญาตลงฺกาวุตฺตนฺโต, เทสมาคมฺม โรหณํ;

กาฬติตฺเถ วสํ วสฺส-เมกํ รชฺชมการยิฯ

[13]